Lumia линијата на телефони на Nokia, a потоа и на Microsoft ветуваше многу на почетокот, особено со моделите како Lumia 920 и 520, но продажбата никогаш не го достигна потребното ниво. Затоа, во декември Microsoft ќе престане да ги продава овие телефони на пазарот, но фанови на Windows 10 Mobile не очајувајте – Surface тимот ќе не опслужи со нов телефон наредната година.
За оние кои ги следат овие работи, ова не е никакво изненадување. Продажбата на Lumia телефони е рекордно ниска, скоро и незабележителна, а протечени информации за Surface телефон, дури и најави од високи луѓе во Microsoft веќе имаше неколку пати.
Згора на тоа, Windows 10 не може да биде целосно универзален оперативен систем, доколку недостасува најважната алка – мобилната верзија, па затоа Microsoft и не смее да си дозволи да престане да произведува телефони со Windows 10 Mobile.
Информациите дека ќе престане да се продаваат Lumia телефони, заедно со тоа дека ќе биде лансиран Surface Phone се од WinBeta, веб сајт кој досега бил прилично доверлив во врска со ваквите информации, па нив може да им се верува, иако не се нешто особено ново, односно се прилично очекувани.
Сѐ уште не може да потврдиме кога ќе биде лансиран фамозниот Surface Phone, но очекувам тоа да се случи најкасно пролетта наредната година, најверојатно заедно со новите Surface Pro 5 и Surface Book 2 или пак малку подоцна од тоа.
Офанзивата на нови уреди Microsoft инаку ќе ја почне со Surface „се во едно“ компјутер, кој треба да биде претставен на крајот од Октомври.
Извор: The Next Web, WinBeta, ARS Technica
