OpenAI најави дека нивната нова и доста интересна функција „Advanced Voice“ од оваа недела ќе им стане достапна и на бесплатните корисници. Најавата дојде заедно со најавата дека сега сите корисници на неколкуте платени верзии од ChatGPT ќе имаат пристап до новата функција.
Како и досега, оваа функција нема веднаш да им биде достапна на корисниците од ЕУ, како резултат на строгата политика и закони кои се донесени изминатите години.
Advanced Voice е нова функција која стана возможна со GPT-4o јазичниот модел и на корисниците им овозможува уште поприроден начин на комуникација со ChatGPT.
„Четботот“ со Advanced Voice одговара уште послично на човек, односно поприродно, може да прикажува емоции, а исто така реагира на брзината со која корисникот зборува. Корисниците можат да продолжат да зборуваат додека ChatGPT одговара и со тоа да го променат или дополнат своето прашање.
Корисниците кои не плаќаат за ChatGPT сепак ќе имаат доста големо ограничување, а тоа е можност за користење на Advanced Voice до 15 минути во месецот. Затоа и од OpenAI ова го нарекуваат можност за проба од страна на бесплатните корисници, а е и одличен начин да мотивираат дополнителни луѓе да почнат да плаќаат за сервисот.
Уште една одлична работа која беше најавена беше и новата Realtime API алатка. Со оваа алатка, кратко кажано, програмерите ќе можат да ги интегрираат гласовните можности на ChatGPT во нивните апликации, а тоа ја вклучува и новата Advanced Voice функција.
