Поминати се 11 години од претставувањето на сопствена апликација за мапи од страна на Apple, која се’ уште се „мачи“ да конкурира на најпознатата Google Maps, а на почеток дури имаше и големи критики за нејзиниот квалитет.
Оваа ситуација изгледа конечно почнува да се менува, па според информациите корисниците почесто се решаваат да и дадат шанса на Apple Maps, па голем дел од нив дури ја преферираат оваа апликација во споредба со Google Maps.
Овие информации сепак не се официјални и доаѓаат како заклучок од страна на The Wall Street Journal, кои ги темелат на коментари и мислења од нивните читатели.
Заклучокот останува дека сепак повеќето корисници на iPhone продолжуваат да ја инсталираат Google Maps и покрај тоа што Apple Maps доаѓат прединсталирана со телефоните.
Причината поради која Apple Maps добива на популарност е во фактот дека апликацијата постепено ги добива сите функции кои ги има кај Google Maps, а според некои, дел од нив се подобри кај Apple, посебно кога е во прашање корисничкиот интерфејс.
Треба да се истакне дека Apple Maps дури оваа година добија можност за гласовна навигација во Македонија, а таа посебно е корисна кога се користи со Apple Watch.
Сепак, барем во нашата земја, поголемиот дел од бизнисите се поставени на Google Maps и ги нема на Apple Maps, па оваа апликација не е баш корисна кога се бара некоја таква локација.
Со iOS 17, Apple ја воведува можноста за симнување на одреден регион за да може да се користи без интернет конекција.
