До пред 2-3 години беше нормално за секој iOS корисник што го знаеме да прави JailBreak, најголемиот дел уште прв ден откако ќе купат iPod touch или iPhone.
Причината за ова беше секако тоа што iOS во тоа време беше екстремно ограничен, а Apple одбиваа да ги вградат дури и наједноставните опции во својот оперативен систем. Под едноставни системски функции секако мислиме на оние работи кои Андроид уредите ги имаа уште од најпрвите верзии на системот, функции кои не бараат некаков специјален хардвер или ултра генијално софтверско инженерство – туку најобична желба да се имплементираат.
Затоа и повеќето од нас моравме да правиме JailBreak и да користиме Cydia хакови за наједноставни работи како брзо гасење Wi-Fi, ефикасни нотификации и добар lock-screen.
Откако Apple конечно ги воведе сите основни системски функции со iOS6 и iOS7 – желбата за правење Jailbreak драстично опадна кај повеќето корисници, впрочем денеска е ретко да се види човек кој се “замара” со правење JailBreak, и повеќето корисници се задоволни со оперативниот систем каков што си е.
Сепак, одвреме навреме излегуваат Cydia хакови кои може да не натераат повторно да размислиме за правење JailBreak
FlipControlCenter е еден таков моќен хак и доаѓа од Ryan Petrich – човекот позади DisplayRecorder.
Во основа овој хак дозволува да се менува распоредот и бројот на опциите во контролниот центар.
На пример иконата за Wi-Fi може да биде десно наместо лево, па дури и целосно да се отстрани или замени со некоја друга опција – на пример со опција за контролирање на VPN-от или копче за директен пристап према сетинзите на мобилниот. FlipControlCenter засега дозволува да се користат следниве копчиња на контролниот центар:
- Settings
- Airplane Mode
- Wi-Fi
- Rotation
- Bluetooth
- Auto lock
- Do Not Disturb
- Location Services
- Respring
Се чини дека оваа можност е особено битна за многу корисници. Впрочем бројни iPhone фанови и новинари низ светот блогираа дека токму поради овој хак размислуваат за повторно правење на JailBreak.
За жал овој хак сеуште е недостапен за iPhone 5s корисниците, а воедно и нема најава дали и кога ќе биде достапен за истите.
