Во март оваа година Google пушти, може да се каже потребен, редизајн на нивните „office“ апликации, односно Docs, Sheets и Slides. Овој редизајн не донесе драстична промена на изгледот и функционалноста на апликациите, но го освежи застарениот изглед и го донесе во рамките на Material стилот од компанијата.
Сега овој редизајн доаѓа и кај Android верзиите од апликациите, па може да се каже дека корисниците добиваат унифицирано искуство.
Разликата во изгледот најмалку ќе може да се забележи на мобилните секако, но затоа корисниците на таблет компјутерите ќе имаат модерно искуство кое е исто со апликациите преку веб.
„Воведуваме модернизиран визуелен дизајн за апликациите Google Docs, Sheets и Slides на Android уредите. Во наредните недели, корисниците на Android ќе забележат освежен изглед за работи како што се лентата со алатки за уредување, иконите, боите на заднината и многу повеќе.“ – истакнаа од Google во кратката најава за оваа новина.
Главната новина која веднаш се забележува е горната лента со алатки, која сега е со заоблени агли и изгледа доста поедноставно и визуелно поубаво, кратко кажано.
