Google Wallet апликацијата наскоро се очекува да добие можност за додавање на било какви додатни картички и документи, покрај досегашните кои сепак мораат да имаат некаков код на нив за да можат да бидат скенирани.
Новата можност треба да стане достапна благодарение на вештачката интелигенција која ќе може да препознае за каков документ се работи дури и кога истото не е лесно очигледно.
Со ова корисниците ќе добијат можност да ги додадат своите картички за попуст, студентски легитимации, картички за спортски активности и слично.
По препознавањето на картичката корисниците ќе можат да ги проверат податоците, како и видот на картичка. Личните картички и документи ќе бидат ставени во посебен дел кој нема да може да се отвори без автентикација од страна на корисникот.
До оваа новина повторно е дојдено преку разгледување на кодот од тест верзиите од апликацијата, па не можеме да знаеме кога се планира оваа новина да биде пуштена од страна на Google.
Дополнително, не е познато дали ќе биде достапна за сите свои корисници или сепак ќе биде ограничена во помал број на земји.
