Доколку сте корисник на некој од мобилните производи од Apple, сигурно сте запознаени со iCloud функцијата која што овозможува синхронизација на вашите контакти, слики, документи и слични фајлови со облакот. Ова потоа овозможува нивно користење доколку го изгубите уредот, доколку имате повеќе од еден уред и слично.
Со претставувањето на iOS 8 оваа година на WWDC конференцијата, Apple го претстави и iCloud Drive. Во основа iCloud Drive е нешто што го става овој сервис во облакот од компанијата на ниво со другите популарни како што е Dropbox. Drive ви овозможува да фајловите зачувани во облакот ги прегледувате како што тоа го правите со вашите фајлови зачувани на вашиот компјутер. Фајловите се поделени по папки и можете да ги отворате од било кој уред кој што има поддршка за iCloud Drive.
Поддршка за iCloud Drive доаѓа со најновите верзии од двата оперативни системи на Apple, односно со iOS 8 и OS X Yosemite. Од денеска поддршка добиваат и корисниците на Windows, а поддршката ја добиваат пред корисниците на Mac, поради фактот што најновата верзија од OS X уште не е официјално достапна за сите корисници.
Поддршката за iCloud Drive доаѓа со најновата верзија од iCloud for Windows. Папката од Drive ќе можете да ја видите како посебна папка во File Explorer, како и во делот за омилени папки. Со други зборови, iCloud Drive папката ќе биде достапна како што тоа е случајот со Dropbox или OneDrive, кои што по инсталирањето се прикажуваат како локални папки во системот. Со тоа ќе можете да ја прегледувате и изменувате содржината на вашиот Apple облак.
Најновата верзија од iCloud for Windows е достапна за корисниците на Windows 7 и понов, а можете да ја симнете преку следниот линк.
Извор и слики: Apple, ArsTechnica
