Meta конечно додава поддршка за динамична промена на бојата во Android и со тоа на корисниците ќе им овозможи нивната Instagram апликација да изгледа соодветно на екранот на корисниците кои ја користат оваа можност.
Facebook изгледа ќе мора да почека уште некој период, па сината икона на оваа апликација ќе продолжи да го нарушува изгледот на главниот екран.
Динамичната боја е функција која првпат стана достапна со Android 12, но стана вредна да се користи дури со наредната верзија, односно со Android 13. Оваа функција овозможува промена на бојата на иконите, по избор на корисниците, во некоја од боите кои се извадени од позадината која се користи во моментот.
Кога некоја апликација која корисникот ја има на главниот екран нема поддршка за оваа промена, може да се каже дека се уништува целото искуство, посебно кога остануваат една или две апликации кои ги задржуваат своите оригинални икони.
Со оглед на тоа што апликациите од Meta се едни од најпознатите, ретко кој ги нема поставено на главниот екран, па важноста за поддршка за промената на боите не е мала.
Оваа функција на Android, покрај бојата на иконите, ја менува и бојата на копчињата, контролниот центар и слично.
