Наместо да го барате некој корисник по име, па тоа не секогаш веднаш успева, посебно кога се работи за личност која само што сте ја запознале, друштвените мрежи обично користат различни видови на кодови кои можат да бидат скенирани од другиот мобилен и на тој начин да им биде прикажан директно профилот.
Ова е одличен начин за додавање некого на друштвените мрежи, а Instagram веќе ја имаше таа можност преку нивните таканаречени ознаки со име, односно „nametag“. Во менито од Instagram корисниците можеа да притиснат на Nametag копчето, по што ќе им се прикаже посебна „слика“, па доколку друг корисник ја скенира со својата камера преку Instagram апликацијата, ќе му биде прикажан профилот.
Сепак, секогаш е подобро кога се користи универзално решение поради достапноста и едноставноста. QR кодовите одамна веќе се користат за повеќе намени, а и повеќето камери имаат можност да ги скенираат и да ја прикажат вградената информација.
Instagram на местото на Nametag почна да ги користи познатите и универзални QR кодови, па сега е многу поедноставно да се сподели сопствениот профил. Функцијата се наоѓа на истото место и функционира исто, а главната разлика која сега ќе ја имаат корисниците е што другата страна веќе не мора да ја отвара Instagram апликацијата за да може да го скенира кодот.
Друга поголема предност на оваа одлука од Instagram е што поради популарноста на QR кодовите, бизнисите сега ќе може да почнат да ги поставуваат своите кодови на повеќе места, како на пример на менијата во рестораните, па корисниците лесно ќе можат да препознаат за што се работи и да го скенираат кодот за да го отворат профилот на тој бизнис.
Оваа функција прво беше пуштена во Јапонија како тест, а сега им е достапна на сите корисници во остатокот од светот.
