Во денешно време бројот на веб страни е голем, а таа бројка продолжува да се зголемува. Повеќето од вас сакаат да ја искористат предноста која што ја нуди интернетот, доаѓање до информации од повеќе извори, меѓутоа тоа е скоро невозможно да го направите без притоа цел ден да го поминете пред компјутерот. Поради тоа се користат апликации кои што ги собираат големиот број на веб страни и ја прикажуваат нивната содржина на едно место, поделена според категории, што овозможува многу побрзо да дојдете до што повеќе информации.
Денеска ќе ви ја претставиме македонската апликација Klik, која што е достапна за корисниците на iPhone телефоните, а може да биде инсталирана и на iPad. Оваа апликација вклучува голем број на македонски веб страни, а нови редовно се додаваат. Читањето на содржината е организирано преку избор на категории, со што можете да ги видите сите новости поврзани со одредена тема од достапните веб страни, или со избор на конкретна веб страна, па да ги видите сите новости од истата. Доколку некоја од веб страните ви се допаѓа и сакате почесто да ја читате, можете да ја додадете во листата на омилени наречена Мој избор.
Дизајнот на апликацијата е прилагоден за стилот кој што се користи во iOS 7, па така нема да се издвојува од остатокот од оперативниот систем. Навигацијата е едноставна и интуитивна, па лесно ќе можете да се снајдете во неа. Мала забелешка имаме на тоа што изборот на некоја категорија или портал се врши со кликање на посебно копче кое што се наоѓа на горниот десен ден од екранот и истото е напишано во не толку разбирлив фонт, па нас ни требаше некоја секунда додека да успееме да направиме избор. Приказот на статиите од изворите е направен на интересен начин, преку прикажување на главните слики зад насловот на истите.
Апликацијата е достапна во продавницата за апликации и можете да ја симнете преку следниот линк.
