Opera во април го претстави Opera One, целосно редизајнирана верзија од прелистувачот која требаше да биде пуштена до крајот на годината. Оваа верзија според компанијата сега е подготвена за пуштање, па корисниците можат да ја симнат.
Како главна карактеристика на Opera One се истакнува интеграцијата на вештачката интелигенција, но не како додаток, туку целосно во самиот код од апликацијата. Вештачката интелигенција е наречена Aria и е направена на основа на технологијата од OpenAI, односно GPT. На тоа е додадена и Composer AI технологијата од Opera. Корисниците можат да ја користат вештачката интелигенција преку лентата во прелистувачот, но и нов дел како командна линија до кој се стига со Ctrl+/ во Windows, односно Cmd+/ во Mac.
Opera One прелистувачот се промовира како модуларен прелистувач. Ова значи дека покрај тоа што функциите ќе се додаваат со тек на време, истите ќе бидат достапни на корисниците зависно од тоа што го прават. Поради ваквиот начин на функционирање, Opera One никогаш не треба да изгледа како преполнет со функции, а истите ќе се прилагодуваат на корисникот.
Tab Islands беше уште една новина која можевме да ја видиме при првата презентација на прелистувачот. Отворените табови ќе се групираат во групи, но тоа ќе го прават автоматски и со помош на вештачката интелигенција.
