Во март оваа година Google најави дека Chrome конечно ќе добие режим за читање, односно „reading mode“. Ова е нешто што е веќе одамна достапно кај повеќето, ако не и сите други прелистувачи, а Google јасно е зошто го одложува пуштањето, овој режим ги трга рекламите и останува само текстот.
Поради ова и режимот за читање во Chrome нема да биде стандарден каков што е кај другите прелистувачи или каков што е од додатоците. Reading mode во Chrome ќе биде поставен во лентата од прелистувачот на десната страна, заедно со Reading List, Bookmarks и другите, па на левата страна ќе остане оригиналната статија.
Со тоа ќе се „спречи“ тргањето на рекламите, а корисниците сепак ќе добијат прочистен кориснички интерфејс каде се гледа само текстот од страната. Тоа што се наоѓа на десната страна во помал дел од екранот, ќе видиме дали ќе им пречи на корисниците.
Овој нов режим требаше да биде пуштен со сегашната верзија од Chrome, но сепак истата ја гледаме како дел од Chrome 115 beta. Тоа значи дека функцијата ќе стане достапна за некоја недела, со мало задоцнување од најавите.
Покрај оваа новина, мало подобрување добива и Memory Saver функцијата, која ги исклучува од меморијата табовите кои не се користат во моментот, како и автоматска надградба на страните од HTTP на HTTPS.
