Во 2017 Microsoft најави интересна функција за Windows 10, која требаше да овозможи отворање на било која апликација во нов „таб“, наместо во нов прозор, исто како што се отвораат во денешно време веб страните.
Оваа функција, која беше наречена Sets, беше откажана во 2019, но корисниците не останаа без можноста за групирање на прозорите во еден прозор, во различни табови.
Познатата компанија Stardock, која стои зад развојот на одличните Start 11, Windows Blinds, Fences и слични, ја претстави Groupy. Оваа апликација во основа им ги овозможи на корисниците функциите од Sets, а сега истата ја добива својата втора верзија.
Groupy 2 се’ уште е во бета верзија, а во тој период е и за 3 долари поевтина, односно може да се купи за 7, наместо за 10 долари колку што ќе чини кога ќе излезе од тест фазата.
Новата верзија донесува неколку новини кои ја прават апликацијата уште подобра. Корисниците сега ќе можат да ги групираат апликациите, односно отворените апликации во еден прозор да може да се отворат повторно со еден клик на кратенката на „таскбарот“.
Дополнително, корисниците можат да го изберат стилот на табовите, а тука се уште неколку можности поврзани со изгледот на табовите, како што е избор на посебна боја и слично.
Апликацијата е достапна преку страната на Stardock, односно преку овој линк.
