Минатиот месец можевме да прочитаме за заднинската технологија на чиј развој работат од SwiftKey за нивната популарна алтернативна тастатура за Android платформата. Истата е наречена неврална технологија и ќе овозможи многу пологични и корисни предвидувања на тоа кој е наредниот збор кој што сакате да го напишете.
После тестирањето на новата верзија од апликацијата во бета, од оваа недела е достапна за сите корисници. SwiftKey 6 за Android доаѓа со значителни промени кои што би требало да ја направат тастатурата уште покорисна, а и повторно да ја истакнат над конкуренцијата.
Главната промена во новата верзија е предвидувањето на наредните два збора при пишување, нешто што треба да овозможи уште побрзо пишување со помалку кликови на буквите. Како што им е познато на активните корисници на SwiftKey, предвидувањата, а со тоа и предлозите на зборови, стануваат се подобри со тек на време. Технологијата на која што работи тастатурата го учи стилот на пишување и успева да ги подобрува предвидувањата.
SwiftKey 6 доаѓа и со редизајн на делот за прилагодувања кој што е целосно направен според правилата на материјалниот дизајн. Исто така, подобро направен е и делот за emoji икони, па корисниците би требало многу полесно да ги избираат и внесуваат во пораките.
Уште една новина која што вреди да се истакне е додавањето на 34 нови теми за тастатурата. Со ова корисниците ќе можат да ја изберат онаа тема која што на нив најмногу им одговара, а доколку сте како нас, ќе можете да ги менувате доволно често за да не ви стане монотоно.
SwiftKey 6 е достапна во Play Store и можете да ја инсталирате надградбата доколку веќе ја користите или да ја симнете преку следниот линк.
Симни ја SiwftKey 6 за Android
Извор: SwiftKey
