Мерењето на растојанието помеѓу две или повеќе точки на мапите може да ви се најде како корисна функција во ситуациите кога сакате да измерите нешто што не е стандардна улица. Кога ве интересира колку има до градот каде што ќе одите на одмор на пример, тоа лесно можете да го направите користејќи ја функцијата Directions, со која што покрај објаснувањето како да стигнете до локацијата, ќе ви биде прикажана и оддалеченоста и времето потребно да стигнете со неколку начини на превоз.
Меѓутоа можеби сакате да измерите колкаво е растојанието на патеката каде што спортувате, или било кои други точки кои што не се поврзани со главна улица, па поради тоа не можете точно да ги измерите користејќи ја Directions функцијата. Google Maps веќе одамна дозволува мерење на растојанието помеѓу две или повеќе точки. За да можете да ја користите оваа функција треба да ја вклучите преку Maps Labs, доколку уште ја користите старата верзија од Google Maps.
Кога Google ја претстави новата верзија од мапите, оваа функција беше тргната, како и од новата верзија на Maps за Android уредите. На Android се’ уште не може да се користи функцијата, но затоа истата е достапна преку веб верзијата. Се што треба сега е да изберете одредена точка на мапата и да притиснете на Measure Distance опцијата која што се наоѓа во менито кое што се појавува со притискање со десното копче на маусот.
Можете да го измерите растојанието помеѓу било кои две или повеќе точки, без разлика каде тие се наоѓаат или поминуваат. Точките можете да ги бришете или да ја менувате нивната локација, а помеѓу секоја од нив дадено е нивното растојание. Вкупното растојание помеѓу првата и последната точка е прикажано на горната лева страна, односно под полето за пребарување. Кога сакате можете да притиснете на Clear measurement или на X под полето за пребарување и од мапата ќе бидат тргнати точките.
