Microsoft вчера ја започна својата Build 2020 конференција, за првпат одржана целосно онлајн поради познати причини. На конференцијата беа претставени доста новини поврзани со сервисите од компанијата, како и Windows оперативниот систем.
Една од поинтересните работи кои беа претставени, а до некаде може да се каже и не толку очекувано е Windows Package Manager. Се работи за алатка која кај Linux се користи одамна и им ја олеснува работата на систем администраторите.
Windows Package Manager, алатка во главно наменета за администраторите, овозможува пребарување, симнување, инсталирање и бришење на апликации, се преку командна линија или со други зборови кажано, со користење на тастатурата и без сликовитиот приказ кај Microsoft Store или веб страните на апликациите.
Ова е одлично кога точно се знае што е потребно и се што му треба на администраторот е брз начин за инсталација на апликации, а со креирање на скрипта, тоа може да се направи и за повеќе апликации одеднаш.
Во првата тест верзија од Windows Package Manager не е овозможено ажурирање на апликациите, како и нивно бришење, но во иднина истото ќе биде вклучено.
Иако апликациите се симнуваат од серверите на нивните издавачи, сепак листата на достапни апликации е зависна од тоа кој има поднесено апликација за да биде достапна преку Windows Package Manager.
Инсталацијата на апликациите, како и другите активности, се прави преку командата winget преку Command Prompt, PowerShell или новата Windows Terminal апликација. Со едноставно внесување на winget и името на апликацијата, истата се симнува и инсталира на компјутерот.
Windows Package Manager е со отворен код и може да се инсталира преку оваа страна.
