Кој од вас тука ја знае античката кинеска игра Го? Се работи за игра на табла каде постојат полиња и црни и бели „каменчиња“. Секој играч ги мести каменчињата на таблата и поентата е да се завземе најмногу територија т.е. повеќе од противникот.
Изгледа супередноставно, но ќе се замислите кога ќе ви кажам дека Го има 10761 можни комбинации, што е повеќе од бројот на атоми во Универзумот и далеку повеќе и од шахот кој држи околу 10120! Во ред, ќе си речете, тоа е навистина многу. Како е тоа битно во случајов?
Имено, DeepMind на Google успеа да го победи светскиот шампион во Го бидејќи во меч од 5 игри постигна 3 победи. Во ред, компјутерот може да пресметува далеку повеќе комбинации од човекот, па тоа не би требало да биде проблем…? Не баш. Бројката на можни комбинации укажува на тоа дека оваа игра не може да се игра на база на чисти пресметувања на комбинации туку мора да се игра на начин кој изискува интуиција.
Интуицијата е карактеристика на биолошките мозоци која се базира на нивната способност да препознаваат патеки на активности и преку тоа инференцијално да го претпостават следниот чекор во услови на силно ограничени информации. Биолошките мозоци имаат големо ограничување во однос на информациите кои можат да ги примат за некоја работа и не можат да се надеваат дека ќе ги приберат сите битни информации пред да направат одлука, што ги натерало да ја развијат интуицијата т.е. препознавањето на патеки.
Бидејќи Го бара интуиција, а не брутално пресметување на милиони комбинации, тоа значи дека DeepMind успеалe да развијат интуитивен алгоритам, нешто што се сметаше својствено за нас и далеку од постигнување во оваа деценија.
На кратко:
Компјутерите станаа еднакво способни со нас во интуиција и креативност (барем во Го).
Земете некое време да го апсолвирате горекажаното.
Како го постигнале ова од DeepMind
Нивниот пристап се базира на вештачки неврални мрежи. Најчесто се работи за симулација која вклучува „неврони“ т.е. симулирани неврални единици кои се поставени налик биолошките мозоци. Компјутер ги пресметува нивните празнења и полнења кои се базираат на карактеристики емулирани од биолошките мозоци.
Ваквите неврални мрежи се далеку поспособни во емулирање на способностите на биолошките мозоци и со тоа уникатните карактеристики како интуиција, креативност и препознавање на патеки.
Заради сложеноста на ваквите емулации потребни се моќни компјутери кои можат да ја „возат“ емулацијата ефикасно како не би се чекало со денови пред да се донесе одлука. Воедно потребно е постојано подобрување на алгоритмите на кои функционираат самите мрежи. Цената на компјутерската моќ значително паѓаше последните две децении, а научната работа значително ги подобри алгоритмите за вештачки неврални мрежи.
Резултатот е алгоритам кој победи светски шампион во игра каде чистото пресметување не игра голема улога туку интуицијата и креативноста.
Што сега?
Сега треба да бидете прилично „загрижени“. Волку брз развиток на настаните е неочекуван, па не сум сигурен дека човештвото знае како да се носи со него. Имено, ако алгоритам како DeepMind има способност да размислува стратешки и интуитивно, тоа значи дека би бил супериорен во воено стратегизирање, планирање и изведба. Армијата која би го употребила прва (а некако имам интуиција дека веќе се тестира) ќе предизвика трка на вооружување од другите армии за да не заостанат во капацитетите.
Истите алгоритми би можеле да бидат употребени од полицијата за да оневозможи протестно собирање на луѓе; разни влади и корпорации би можеле да ги употребат за да спречат објавување на информации на Интернет кои не им одговараат или да создаваат виртуелни личности кои ќе пишуваат поддржувачки коментари и статии на Интернет; алгоритмите ќе можат да нè изиграат во вложување на пари, предизвикувајќи нивно богатење на наша сметка; алгоритмите ќе нè заменат практично во сè; и на крајот, една доволно способна СИ може да ни ги хакира системите, да ни ги превземе беспилотните летала и друга воена машинера, и ефикасно да нè пороби. Едноставно нема граница на тоа што сè може да постигнат алгоритмите и што сè ќе можат да постигнат само за една декада.
Бидете многу загрижени.
