Мисијата Artemis II успешно го заврши седумчасовното прелетување околу Месечината, означувајќи го првото враќање на човештвото кон Земјиниот сателит по мисијата Apollo 17 во 1972 година. За време на шесттиот ден од летот, екипажот во вселенското летало Orion изврши серија планирани набљудувања, при што беа направени детални фотографии од темната страна на Месечината.
Астронаутите на NASA Рид Вајсман, Виктор Гловер и Кристина Кох, заедно со астронаутот од Канадската вселенска агенција (CSA), Џереми Хансен, поставија нов рекорд за најголема оддалеченост од Земјата до која патувал човек. Со достигнување на далечина од 406.771 километри, тие го надминаа претходниот рекорд поставен од мисијата Apollo 13 во 1970 година, кој изнесуваше 400.171 километри. За време на најблискиот пристап, леталото помина на само 6.550 километри над лунарната површина.
При прелетувањето на темната страна на Месечината, екипажот ги анализираше и фотографираше геолошките карактеристики на теренот. Опсервациите вклучуваа кратери од удари, древни текови на лава, како и пукнатини и гребени кои сведочат за долготрајната еволуција на лунарната површина. Астронаутите исто така пријавија нијанси на бои видливи со човечко око, кои се клучни за одредување на минералниот состав и староста на специфичните геолошки формации.
Траекторијата на леталото Orion овозможи екипажот да посведочи на феноменот познат како заоѓање на Земјата („Earthset”), моментот кога нашата планета се спушта под лунарниот хоризонт додека леталото поминува зад Месечината. Околу 40 минути подоцна, кога Orion излегува од спротивната страна, астронаутите го набљудуваат изгревањето на Земјата („Earthrise”) — глетка што луѓето не ја виделе од мисијата Apollo 17 во 1972 година.
По завршувањето на периодот за лунарна опсервација, екипажот набљудувал речиси едночасовно соларно затемнување предизвикано од порамнувањето на леталото, Месечината и Сонцето. Овој настан им овозможил да ја анализираат соларната корона видлива околу рабовите на Месечината, а за време на затемнувањето пријавиле и шест светлосни блесоци на лунарната површина предизвикани од удари на метеороиди.
По успешното завршување на клучните фази од прелетувањето и обновувањето на комуникацискиот сигнал со Земјата, екипажот на Artemis II одржа директен разговор со претседателот Доналд Џ. Трамп и администраторот на НАСА, Џаред Ајзакман, како дел од континуираниот пренос на агенцијата.
Мисијата сега продолжува според планираната траекторија за враќање кон Земјата, собирајќи клучни податоци потребни за идните мисии со човечки екипаж.
Видеото од NASA, кое продолжува да емитува во живо, можете да го погледнете во продолжение, а можете и да го вратите до моментите на прелетувањето околу Месечината.
