Nearby Share, функцијата на Android која овозможува споделување на датотеки помеѓу овие уреди, од март оваа година стана достапна за корисниците на Windows. Пуштена во бета форма, апликацијата им овозможува на корисниците искуство какво што имаат корисниците на Apple и познатата AirDrop функција.
Апликацијата сега официјално е достапна, односно Google ја тргна бета ознаката и ја пушти првата верзија од Nearby Share за корисниците на Windows.
Исто како и со AirDrop, уредите со помош на Nearby Share се што треба е да се во близина еден со друг, па преку Bluetooth се воспоставува конекцијата и датотеките се префрлуваат преку Wi-Fi.
За корисниците кои префрлуваат датотеки од нивните уреди, односно помеѓу уреди најавени со истата Google сметка, прифаќањето на трансферот е автоматско.
Префрлување е можно на било какви датотеки, но од Google истакнуваат дека секогаш најпопуларни се сликите и видеата. Од пуштањето на бета верзијата од апликацијата досега биле префрлени повеќе од 50 милиони датотеки, од страна на 1,7 милиони корисници.
Со пуштањето на официјалната верзија за сите корисници, истата добива и неколку новини. Покрај подобрувањето на стабилноста и брзината на трансфер, корисниците сега можат да гледаат до каде е префрлувањето на датотеките, како и да ја видат сликата во самото известување, пред да почне трансферот.
