Познатите и доста популарни OnePlus ја претставија својата најнова генерација од нивните телефони. Достапни се две нови варијанти од новата, односно осмата серија, OnePlus 8 и OnePlus 8 Pro.
Како и кај сите производители, Pro моделот е тој којшто ќе ги има повеќето главни карактеристики кои ќе го привлечат вниманието на корисниците, а обичниот модел е тука за тие кои сепак сакаат нешто пониска цена.
OnePlus 8 Pro доаѓа со 6,78 инчен екран со резолуција од 3.178 на 1.440 пиксели. Главната карактеристика на овој екран е стапката на освежување на сликата од 120 Hz, нешто што ќе придонесе до побрзи анимации, како и подобро користење на целиот екран.
Од OnePlus истакнуваат дека овој екран е досега најдобриот и најсветол екран кој ја има оценката A+ на DisplayMate, а посебно се истакнува и прецизноста на боите.
За одличните перформанси по кои се познати OnePlus ќе се погрижи најновото од Qualcomm, Snapdragon 865, а овој процесор доаѓа и со модем за 5G конекција, нешто што стандардно доаѓа кај овој телефон.
RAM меморијата има 12GB, а просторот за податоци е со капацитет од 256GB.
На задната страна OnePlus 8 Pro има 4 камери кои доаѓаат со 48 мегапиксели кај главната камера со сензор од Sony, исто така 48 мегапиксели кај втората камера која е наменета за ултра широк агол на сликите, како и камера со можност за зумирање. Четвртата камера е таа што е интересна и е наменета за филтри за боја со што се овозможуваат одредени ефекти при сликање.
Батеријата на телефонот е со капацитет од 4.510 mAh, а доаѓа со можност за брзо полнење кое дури и кај безжичниот полнач е со 30W. Тоа овозможува полнење на 50% од батеријата за само половина час.
Вториот модел, односно „обичниот“ OnePlus 8 доаѓа со нешто помал екран со големина од 6,55 инчи, како и помала стапка на освежување од 90 Hz, што сепак е повеќе од стапката која се користи кај повеќето други телефони.
