Задутре, односно во среда на 24 Јуни велосипедистите организирани од неофицијалната група на ентузијасти „На Точак“ организира собир, таканаречен „Критична маса #38“ кој што ќе се одржи во Паркот на Франкофонијата во 19:00 часот.
Идејата зад собирот е подигање на свеста за потребата од повеќе, но и подобри паркинзи за велосипедите во градот. Исто така, според закон донесен минатата година, сите јавни институции се обврзани да имаат велосипедски паркинзи пред нивните објекти, а доколку тоа го немаат обезбедено, ќе мора да го направат до Август оваа година. Сите нови јавни објекти мора да обезбедат вакви паркинзи од самото нивно пуштање.
Она што од неофицијалната група сакаат да истакнат е и видот на паркинзи кои што обично се поставуваат за велосипедите. Тие се оние стари кои што сите ги имаме видено и кои што овозможуваат врзување на велосипедот за неговото тркало. Во основа сите знаеме колку велосипеди се украдени со едноставно вадење на тркалото и земање на остатокот од велосипедот.
Паркинзите кои што овозможуваат врзување на велосипедот за неговата рамка овозможуваат многу побезбедно негово оставање. Со оглед на фактот што велосипедите се користат како основно превозно средство од страна на голем број на граѓани, потребната од обезбедување на соодветни паркинзи е нешто кое што институциите треба сериозно да го земат во предвид.
Се разбира тука е и користа од возењето на велосипедите од што повеќе луѓе. Тие не ја загадуваат околината, а и им овозможуваат на возачите физичка активност која што е добра за здравјето.
Со обезбедувањето на повеќе и подобри паркинзи, како и велосипедски патеки, многу повеќе луѓе би се одлучиле да го заменат нивниот стандарден превоз со велосипед.
Извор: На Точак
