Samsung денеска го одржа најавениот Unpacked 2014 Episode 2 настанот кој што беше закажан минатиот месец. На овој настан се очекуваше компанијата да го претстави Galaxy Note 4 и тоа го направи, меѓутоа беше претставен уште еден модел кој што доаѓа со до некаде интересна карактеристика која што треба да го издвои од другите модели, а и конкуренцијата. Вториот модел е исто така од Note серијата и е наречен Galaxy Note Edge. Сепак да одиме со ред, главниот и долго очекуван модел кој што беше претставен денеска беше Galaxy Note 4, па во продолжение да видиме со какви карактеристики доаѓа овој модел.
Galaxy Note 4
Најавен точно една година како неговиот претходник, Note 4 задржува некои од карактеристиките, но претставува и неколку нови и очекувани. Екранот кој што е со големина од 5,7 инчи останува ист како минатиот, меѓутоа конечно доаѓа со QHD резолуцијата најавувана како можност за Galaxy S5 моделот. Тоа значи дека екранот на Note 4 доаѓа со 4 пати поголема резолуција од стандардните HD екрани, односно со 2560 на 1440 пиксели и нивна густина од 515 ppi. Направен е во стандардната за Samsung Super AMOLED технологија, како и Gorilla Glass 3.
Втората исто така голема работа кај Note 4 е процесорот на кој што ќе работи. Зависно од земјата кај што ќе се продава, тој ќе доаѓа со Qualcomm Snapdragon 805 чипсетот и 2.7 GHz Krait 450 четири јадрениот процесор или со Exynos 5433 чипсетот и 1.3 GHz Cortex-A53 и 1.9GHz Cortex-A57 четири јадрените процесори. Графичкиот процесор е Adreno 420. Без разлика од процесорот, Note 4 вклучува 3GB RAM меморија, како и 32GB внатрешна меморија со можност за проширување до 64GB со microSD картица.
Доаѓа со две камери, односно задна со 16 мегапиксели и оптичко стабилизирање на сликата и предна со 3,7 мегапиксели која што има широко аголен поглед за љубителите на selfie сликите. Батеријата е со капацитет од 3.220 mAh што според Samsung треба да издржи до 420 часа во мирување и 21 час во разговори.
Карактеристично за Note 4 е и вклучувањето на металната рамка која што се најавува дека ќе се користи во сите нови модели од компанијата која што е критикувана за евтин впечаток на своите скапи модели. Тоа е поради користењето на пластиката веќе со години. Задниот дел повторно е направен како имитација на кожа, меѓутоа со нешто поразлична шара и без имитацијата на шевови. Доаѓа со сите сензори од S5 моделот, како што е сензорот за отисоци од прсти, сензорот за пулс и слично.
S Pen пенкалото кое што доаѓа заедно со телефонот вклучува одредени подобрувања во осетливоста и треба да овозможи пореално чувство на пишување како на хартија. Оперативниот систем очекувано е најновата верзија од Android, 4.4.4 KitKat, но очекуваме дека ќе добие надградба на новиот Android L во месеците што следат.
Note 4 доаѓа со поддршка за исто така нов уред претставен денес од компаниајта, а тоа е Samsung Gear VR. Се работи за очила за виртуелна реалност направени во соработка со Oculus VR кои што веќе им се добро познати на корисниците.
Galaxy Note Edge
Вториот телефон кој што го претстави Samsung може да се каже дека е скоро истиот како Note 4, со неколку интересни разлики. Edge доаѓа со малку помал екран од 5,6 инчи, меѓутоа сите други карактеристики, како процесорот, камерата, сензорите и слично се исти како со претходно најавениот модел.
Она што го истакнува овој модел од другите модели на Samsung, како и конкуренцијата е вклучувањето на заоблен екран на десната страна од телефонот. Екранот не е посебен, односно е дел од главниот екран, меѓутоа е направен да се однесува како таков. Заоблениот дел е наменет да служи како место за кратенки за често користените апликации, за прикажување на нотификации, кратки пораки и одредени прилагодувања.
Дали на корисниците ќе им се допадне овој модел, останува да видиме, меѓутоа сигурни сме дека компанијата ќе продаде барем неколку милиони од него.
Извор: The Verge, The Verge 2, Cnet, GreenBot
