Meta официјално ја пушти својата конкуренција на Twitter, направена како апликација поврзана со Instagram. Threads веќе може да се симне од двете апликации за продавници, а уште од самиот почеток ќе ви биде понудено поврзување со вашата Instagram сметка, како и можност да почнете да ги следите сите ваши пријатели на оваа мрежа.
Логиката за поврзаноста на Threads со Instagram е сличниот начин на функционирање, односно кратки објави, кои сега со новата апликација се текстуални, наместо само слики и видеа.
Апликацијата изгледа и функционира скоро исто како Twitter, односно кај овој вид на мрежи нема ни потреба од обид за некакво разликување во овој дел.
Корисниците можат да објавуваат до 500 карактери, а тие исто така можат да вклучуваат текст, линкови, слики и видеа до 5 минути.
Главниот на Instagram, Адам Мосери, објави кратко видео преку кое истакнува дека повеќе од 10 милиони корисници се имаат регистрирано на Threads во првите 8 часа, а бројката продолжува да се зголемува и се гледаат доста познати личности на истата.
„Instagram е местото каде што милијарди луѓе ширум светот се поврзуваат преку фотографии и видеа. Нашата визија со Threads е да го земеме она што Instagram најдобро го прави и да го прошириме на текстуални пораки, создавајќи позитивен и креативен простор за изразување на вашите идеи. Исто како на Instagram, со Threads можете да следите и да се поврзувате со пријателите и креаторите кои ги споделуваат вашите интереси – вклучувајќи ги и луѓето што ги следите на Instagram и пошироко. И можете да го користите нашиот постоечки пакет на безбедносни и кориснички контроли.“ – истакнуваат од Instagram.
Threads се гледа дека е направен од страна на тимот на Instagram, па дел од корисничкиот интерфејс е познат и корисниците лесно ќе можат да се прилагодат. Тука се и правилата за објава, како и прилагодувањата за приватност, па корисниците ќе можат да бираат кој може да ги следи, да одговара на нивните објави и слично.
Како што претходно се шпекулираше, Threads во иднина ќе има поддршка за ActivityPub протоколот со што корисниците ќе можат да се следат и со останатите корисници кои користат мрежи кои работат на овој протокол. Најпозната таква мрежа засега е Mastodon, а корисниците дури ќе можат својата сметка да ја префрлат на друга и да не користат Threads повеќе.
Тоа што на крајот на интересира е дали и колку од политиката на модерирање на содржината на Meta ќе стане дека од Threads, односно колку голема цензура ќе има на оваа мрежа.
