Досега читавме протечени информации и гледавме рендери, а сега го знаеме и официјалниот датум кога Samsung ќе го претстави новиот знаменосец со голем дисплеј, Galaxy Note 7 – на 2 август на Samsung 7 Unpacked настанот.
Новиот Galaxy Note ќе биде шеста генерација на уредот, но ќе се вика Note 7 за порамнување со Galaxy S7 серијата. Отсега, сите модели од високата класа на Samsung ќе имаат иста бројка зад името, што ќе биде веројатно полесно за распознавање кај купувачите, а во однос на тоа кој е нов, а кој стар модел.
Galaxy Note 7 инаку ќе има 5,7 инчен AMOLED дисплеј со EDGE рабови и Quad HD резолуција, Snapdragon 821 процесор, 6 GB рам меморија, 64 GB простор со micro SD слот, задна камера со 12 мегапиксели и предна камера со 5 мегапиксели. Според информациите што ги имаме досега, новиот модел ќе биде и IP68 водоотпорен, исто како и Galaxy S7 и S7 Edge.
Покрај овие моќни спецификации, Note 7 ќе биде и првиот смартфон на Android сцената кој ќе има читач за ирисот на окото, покрај веќе стандардниот читач на отпечатоците на прстите. Ова ќе го направи прилично безбеден, особено доколку го користите за онлајн плаќање.
Дизајнот ќе биде најмало изненадување – фотографиите (рендерите) веќе ги имаме и на нив може да се види дека ќе наликува на актуелниот модел, со таа разлика што ќе има Edge дисплеј на страните, кој веројатно ќе почне да се вградува во сите модели на Samsung.
