Xiaomi продолжува да се шири надвор од производството на само мобилни телефони. Тие во своето портфолио на производи покрај сега популарните телефони, имаат и производи како преносни батерии, сет топ боксови, слушалки, спортски алки и многу повеќе.
Оваа недела оваа брзо растечка кинеска компанија претстави акциона камера, односно камера наменета за снимање на разни активности како што се возење велосипед, скијање, параглајдинг и слично.
Веднаш споредувана со главната камера во оваа област, GoPro Hero, Xiaomi Yi Action Camera доаѓа со слични карактеристики како основниот GoPro модел, но и нешто повеќе. Како и обично, она што сепак привлекува најмногу внимание е цената на Yi која што е дупло пониска од нејзиниот главен конкурент, па така таа ќе се продава за 64 долари, додека GoPro се продава за 125 долари.
Сега за сега, Xiaomi Yi е достапна за кинеските корисници, па нема дополнителни информации за можната достапност за останатите.
Што се однесува до карактеристиките, Xiaomi Yi доаѓа со можност за сликање со резолуција од 16 мегапиксели, како и снимање на видеа во Full HD резолуција со 60 слики во секунда. Исто така оваа камера е прилично полесна од својот конкурент и тежи околу 70 грама, вклучува 64GB меморија.
Она што се истакнува кај камерата, која што има прилично ниска цена, е сензорот кој што се користи. Се работи за сензорот Exmor R BSI CMOS од Sony кој што доаѓа со доста високи оценки.
Извор: The Verge, TechCrunch, Cnet
