Google објави нова функција во својот асистент со вештачка интелигенција, која на корисниците им нуди нов начин за организирање на своите разговори.
Станува збор за „бележници“, односно „notebooks“, кои функционираат како посветен простор во рамките на Gemini каде што можат да се чуваат разговорите, инструкциите и различните датотеки.
Ова овозможува сите информации поврзани со еден специфичен проект или истражување да бидат уредно групирани на едно место, што го олеснува одржувањето на контекстот при работа на покомплексни задачи.
Клучната карактеристика на оваа новина е целосната синхронизација со NotebookLM. Бидејќи бележниците се споделени помеѓу двете апликации, секој извор додаден во едната платформа автоматски станува достапен и во другата. Ова значи дека корисниците можат да започнат проект во Gemini, а потоа да ги искористат специфичните алатки кои ги нуди NotebookLM, како генерирање видео прегледи или инфографици, без потреба од рачно префрлување на документите.
Интеграцијата работи во двете насоки, со што се добива континуитет во работата при анализа на поголеми количини информации.
Новата опција почна да се воведува оваа недела и првично им е достапна на корисниците кои имаат претплата на плановите Google AI Ultra, Pro и Plus преку веб верзијата на платформата.
Според информациите од компанијата, во наредните недели пристапот ќе биде проширен кон мобилните уреди, во повеќе европски земји, како и за корисниците кои ги користат бесплатните верзии на алатката.
Процесот за креирање нов бележник се активира директно преку страничното мени во интерфејсот на самата апликација.
