Google најави две нови функции кај најновата верзија од Chrome, кои треба конечно да го подобрат угледот на овој најпознат прелистувач, кога е во прашање потрошувачката на ресурси.
Двете нови функции се наречени Memory Saver и Energy Saver, a ќе им станат достапни на сите корисници на Windows, macOS и ChromeOS во неделите што следат.
Memory Saver функцијата е замислена да ја намали RAM меморијата која Chrome ја троши, а посебно кога се отворени повеќе табови. Оваа функција ја ослободува меморијата која ја трошат табовите кои во моментот не се користат, а со тоа се овозможува подобро функционирање на другите табови, како и другите апликации на компјутерот.
Оваа функција може да се спореди со Sleeping Tabs која Microsoft Edge ја има веќе одреден период и се справува со меморијата која ја троши овој на Chromium базиран прелистувач.
Втората функција, Energy Saver, е замислена да се вклучи автоматски кога батеријата на компјутерот е 20%. За да го намали трошењето на батеријата, Chrome ќе ги ограничи заднинските активности и визуелните ефекти кај страните со анимации и видео.
Овие две функции, кога ќе станат достапни, ќе можат да се вклучуваат и исклучуваат, односно корисниците ќе можат да одлучат дали им се потребни или не.
