Подоцна од обично, AMD ја претстави бизнис верзијата од нивните Ryzen 7000 процесори, достапни за лаптоп и десктоп компјутерите. Ryzen Pro 7000 серијата е направена со Zen 4 архитектурата, а зависно од процесорот, доаѓа со RDNA 3 и со RDNA 2 интегрирана графика.
Со оглед на тоа што бизнис верзиите од процесорите обично се наменети за компаниите кои немаат потреба од најсилното на пазарот, интегрираната графика е доволна за повеќето.
AMD овие процесори дури ги споредува со M2 Pro од Apple, истакнувајќи ги предностите, секако.
Ryzen Pro 7040 серијата за лаптоп компјутерите доаѓа со до 8 Zen 4 јадра и RDNA 3 интегрирана графика. AMD истакнува 17% подобри перформанси во споредба со конкуренцијата, а за Ryzen Pro 7840U процесорот 18% повисоки перформанси и 15% подобра ефикасност во споредба со M2 Pro од Apple.
Серијата за лаптоп компјутерите доаѓа со шест процесори, три со HS ознаката, односно за високи перформанси, како и три со U ознаката, која е повеќе штедлива верзија.
Од друга страна, на десктоп претставени се само три нови процесори и истите имаат до 12 јадра.
Сите детали околу новите процесори се достапни на страната од AMD на овој линк.
