Се шпекулираше одреден период, па и ова испадна точно, Apple во својата MacBook Air серија воведе за првпат избор на уште еден уред, а тоа е новиот 15 инчен лаптоп под овој бренд.
Корисниците со тоа го добиваат најтенкиот, барем Apple така тврди, 15 инчен лаптоп на пазарот, а тоа треба да се додаде на карактеристиките како доста лесен и без вентилатори, што значи тивок уред.
Како што би очекувале, овој лаптоп е само верзија со поголем екран, а остатокот од карактеристиките се во главно исти со ланскиот 13 инчен MacBook Air. Тоа значи дека новиот лаптоп доаѓа со М2 чипот, кој вклучува 8 процесорки јадра, 4 за перформанси и 4 за заштеда, 10 графички јадра, како и 16 јадра за вештачка интелигенција. Исто така, корисниците можат да изберат до 24GB на унифицирана меморија која работи со брзина од 100GB/s.
Екранот е со големина од 15,3 инчи и LED со IPS технологија, а дури од идната година се очекува Apple да почне да користи OLED панели кај нивните лаптопи. Резолуција е 2880 на 1864 пиксели со што се добива нивна густина од 224 пиксели на инч. Светлината на екранот е до 500 „нити“ и доаѓа со True Tone технологијата од Apple.
Apple најавува 18 часа траење на батеријата, што секако е нешто што може да се добие со поголемото тело на уредот.
Камерата на предната страна, односно FaceTime камерата е со 1080p резолуција, а уредот доаѓа со шест звучници, нешто што ќе го подобри звукот, а овие уреди од Apple веќе се познати по тоа.
Сите детали со новиот MacBook Air 15 од Apple страната можете да ги прочитате тука.
