Секојдневно сме сведоци на кампањи за јавно собирање средства за секакви уреди и изуми. Истовремено, сопствениците на лаптоп компјутери и таблети се се’ погласни со критиките на сметка на тоа што плаќаат пари за конфигурации кои имаат ограничени можности за надградба. Токму затоа, не зачудува фактот што на Crowd Supply можете да најдете кампања за прибирање средства за изработка на првиот отворен лаптоп, Novena. Нормално, доколку сте заинтересирани, можете и лично да придонесете за тоа овој компјутер побргу да се појави на пазарот.
За целата идеја е одговорен Ендру Хуанг, познат хакер, како и автор на книгата Hacking the Xbox: An Introduction to Reverse Engineering. Тој, заедно со неговиот колега Шон Крос, решил да започне проект со кој ќе се обиде да стави крај на продажбата на компјутери кои не им даваат на корисниците слобода да одлучуваат за компонентите од кои се состојат. Како што веќе погодувате, проектот го носи името Novena.
Се работи за лаптоп над кој имате целосна контрола и сами одлучувате каков да биде. Што значи тоа? Едноставно, вие кажувате кои компоненти сакате да ги има лаптопот, без притоа да добиете однапред „спакуван“ производ. Се’ што е однапред познато е дека лаптопот доаѓа со четиријадрен ARM процесор од 1.2GHz.
Novena ќе се појави во различни 4 варијанти, односно:
- Just the board (500 долари) – За оние меѓу вас кои сакаат да експериментираат. Покрај гореспоменатиот процесор, добивате и 4 GB RAM, како и картица за безжичен интернет. Работи на Debian Linux.
- All-in-One Desktop (1.195 долари) – Десктоп верзија на Novena. Поврзете ја со тастатура и глувче, и почнете со работа. Одличен избор за канцелариски и работни маси.
- Laptop (1.995 долари) – Ендру тврди дека ова е најдобриот избор за секој „хакер во движење“. Целосна лаптоп конфигурација во која не е вклучена тастатура; изборот за неа е ваш.
- Heirloom Laptop (5.000 долари) – Под претпоставка дека би дале 5.000 долари, мое е да ви кажам дека ќе добиете лаптоп, но со дизајн изработен од дрво и алуминиум, како и веќе вградена тастатура. Несомнено е дека дизајнот изгледа прекрасно, но… 5.000 долари?
Проектот трае до 18-ти Мај, односно до тој дамум треба да се соберат 250.000 долари. По завршувањето на рокот, доколку проектот е успешен, цената на гореспоменатите 4 варијанти ќе порасне за 10%. Затоа, доколку сте заинтересирани за Novena, донирајте веднаш и помогнете во поставувањето темел за лаптопи кои во иднина ќе можете самите да ги уредувате според вашите замисли.
