Играњето на разни видови на игри денеска се прави на повеќе платформи од тоа што бевме научени до пред некоја година. Игрите се достапни и на мобилните уреди, на телевизорите, set top box уредите и слично, како и на „старите“ PC компјутери и играчки конзоли.
Ваквата ситуација е мотивацијата зад производот од компанијата Mad Catz која што произведува периферни компјутерски уреди за гејминг. Lynx 9 е производ наменет за корисниците кои што играат игри на повеќе платформи, а за тоа користат и различни конролери, често купени од разни компании.
Lynx 9 контролерот е модуларен, збор кој што почесто го слушаме во изминатите година дена. Тоа значи дека производот има можност за прилагодување преку менување на неговите делови, а со тоа и неговата форма и намена. Доаѓа во склопена форма која што е погодна за лесно пренесување, по што се отвора и се добива целосно функционален играчки контролер.
Главниот дел од контролерот може да се подели на три дела, односно левата и десната страна, како и главниот дел, мозокот. Со нивното издвојување се овозможува додавање на другите делови кои што доаѓаат со производот. Па така, можно е додавање на тастатура, држач за мобилен телефон, држач за таблет компјутер.
Со тоа се овозможува поврзување и играње со повеќе видови на уреди, без потреба од различни контролери. Тастатурата овозможува и додатно користење на контролерот за пишување, односно користење на кој и да е уред како мини компјутер.
Цената по која што треба да се продава Lynx 9 изнесува околу 300 долари, што се разбира е поскапо од купување на обичен контролер. Сепак целата е тој да замени неколку уреди, па доколку има корисници кои што навистина купуваат неколку вакви производи, можеби овој хибриден уред би претставувал се што им треба. Lynx 9 беше претставен минатата недела на CES2015 настанот кој што се оджа во Las Vegas.
