Microsoft Research, делот од компанијата задолжен за истражување и развој, претстави нов проект на кој што тие работат. Се работи за обична тастатура која што е појачена со сензори кои што ги препознаваат близината и движењата на рацете и со тоа овозможуваат извршување на одредени активности. Сензорите се поставени на просторот измеѓу копчињата, ги има 64 на број, односно 16 на 4 низ целата тастатура. Тие се инфрацрвени сензори со ниска резолуција и груба проценка на движењата, но работат на 300 hertz frame rate и повеќе со што се овозможува детектирање на брзи движења.
Тастатурата вклучува посебен алгоритам кој што препознава поголем број на предефинирани гестови, а можна е поддршка за играње и на игри. Корисниците ќе можат да користат некој од следните гестови: движење на екранот со придвижување на раката од горе, па надоле над тастатурата, зумирање со pinch to zoom гестот како на екраните на допир, менување на активните апликации и многу повеќе. Примерот на кој што е демонстрирана тастатурата е на Apple тастатура, но се очекува од Microsoft да претстават сопствена тастатура понатаму.
Тастатурата е се’ уште во фаза на развој, а од Microsoft Research немаат повеќе информации за тоа кога истата би била достапна комерцијално, односно во продажба за корисниците. Сепак од ова што до сега е презентирано може да се види дека се работи за навистина интересен и корисен концепт кој што навистина би ги заинтересирал корисниците.
Извор: Microsoft Research
