Мобилните уреди се веќе дел од нашите животи и ги користиме насекаде, дури и повеќе отколку што можеби би требало. И иако овие уреди стануваат се понапредни, еден важен дел од нив никако да напредне до потребното ниво. Се работи за батериите кои што многу тешко успеваат да го издржат нивото на користење на уредите, па многу често се наоѓаме во ситуација каде што ни е потребно полнење на уредот, а да не сме дома или до некој извор на енергија. Тука доаѓаат до израз големиот број на преносни батерии преку кои што може да се наполнат уредите кога не сме до извор на енергија.
Modulo е преносен полнач направен од шпанската компанија Idapt и моментално се наоѓа на Kickstarter каде што ги собира потребните средства за почеток на производство, а може да се нарача за цена од околу 30 долари. Карактеристично за овој производ е тоа што е многу мал и тенок и поради тоа доста пренослив. Може слободно да се носи во џебот, без притоа да биде неудобно и да смета. Modulo има капацитет од 2100 mAh и може целосно да ги наполни повеќето уреди. Се полни преку поврзување во струен приклучок или на компјутер, а за понатаму се планира додавање на соларен панел, како и можност за безжично полнење.
