Живееме во време кога полека ќе почнеме да гледаме производи достапни за сите кои до пред некое време можевме да ги видиме само во научно фантастичните филмови. Можеби за некои ова претставува и не толку посакуван развој на технологијата, а ваквите производи ги гледаат како нарушувачи на приватноста, но и човечкиот развој.
Како и да е, овие производи ќе ги гледаме се почесто, а сигурно нема да помине многу време додека почнеме и нормално да ги користиме.
Pillo е мал робот кој е наменет корисниците да го постават во својот дом и да го користат како помошник во грижата за сопственото здравје, но и на блиските.
Тој во главно се користи, а и самото име го покажува тоа, како паметен чувач на апчиња од разни видови, од лекови до витамини. Корисниците се редовно потсетувани кога треба да се напијат некое апче, а истото е веднаш пуштено во посебен сад кој се поставува под роботот.
Сепак, Pillo е многу повеќе од обичен „диспенсер“ на апчиња. Во него е вградена вештачка интелигенција, разни сензори, што овозможува гласовна интеракција и поставување на прашања. Исто така, роботот може да испраќа пораки во случај да некој има заборавено да се напие одредено апче во даденото време.
Покрај користа за апчиња, Pillo може да се користи и за следење на генералното здравје преку поврзување со мобилните телефони и достапните фитнес апликации. Корисниците исто така може да поставуваат прашања како што се бројот на калории во одредена храна и слично.
Pillo моментално е понуден преку Indiegogo, познатата платформа за групно финансирање, а до крајот на кампањата остануваат уште месец дена, при што се собрани повеќе од 80% од потребните средства.
Ќе биде интересно да се види во годините што следат, дали ќе стане нормално домаќинствата да користат некаков вид на паметен помошник од овој вид.
