Едно од најпознатите имиња во светот на безжичните мрежи е Qualcomm. И додека многумина кај нас уште не ни слушнале за овој гигант, истиот планира во многу скоро време да претстави нова технологија со чија помош безжичниот интернет ќе достигне брзини и до трипати поголеми од моменталните.
Технологијата на која се работи веќе седум години е наречена MU-Mimo (multi-user, multiple input, and multiple output). Начинот на кој таа работи вклучува испраќање на податоци на повеќе групи корисници истовремено со помош на алгоритми кои се менуваат во зависност од ситуацијата и густината на интернет сообраќајот. Мора да се напомене дека ова е и тоа како различно од моменталниот начин на работа, со кој еден корисник ги добива потребните податоци, додека останатите чекаат.
Според самите момци од Qualcomm, користењето на MU-Mimo е исто како возење на автопат, односно:
Додека безжичниот сообраќај не се менува, по желба можете да се групирате со други корисници, со што ќе „патувате“ многу побргу, а истовремено ќе придонесете за ослободување на останатите сообраќајни ленти.
За напомена е и дека за максимално забрзување на безжичниот интернет (до 300%), ќе биде потребно и корисниците, но и самата мрежа да ја користат MU-Mimo технологијата. Оние корисници чии уреди нема да работат на MU-Mimo чипови ќе забележат разлика, но далеку од максималната.
Според најавите, оваа технологија ќе стане достапна на почетокот на идната година. Притоа, многу е веројатно дека до неа први ќе добијат пристап сите компании кои работат на производство на уреди што користат безжична мрежа.
