Оптички дискови, за читателите што можеби нема веднаш да се сетат, се CD-ата, DVD-јата, како и моментално најголемите Blue Ray дискови. Blue Ray дискот има капацитет од 25 GB, па до 128 GB за дискови кои што подржуваат едно запишување на податоци. Blue Ray дискот стана популарен со излегувањето на HD резолуцијата, а со тоа и потребата од диск со поголем капацитет од дотогашните DVD дискови. Сепак популарноста на Blue Ray не може да се спореди со популарноста што ја имаше познато CD, поради стримувањето на содржината преку интернет, овозможено со големите брзини достапни денес.
Наменет за деловните корисници, односно за потребата од архивирање на податоци подолг период, Sony и Panasonic го претставија Archival Disc, кој што доаѓа со почетен капацитет од 300 GB со можност за запишување на податоци еднаш. Нивниот капацитет се очекува потоа да биде зголемен до 1 TB.
Покрај тоа што овие дискови ќе започнат како производ наменет за компаниите, се очекува негово популаризирање и кај обичниот корисник. Ова очекување е поради претставувањето на телевизори со 4K резолуција, со што се очекува зголемување и на достапната содржина во таа резолуција.
