Четиричлениот екипаж на мисијата Artemis II влегува во последната фаза од своето патување околу Месечината. Десеттиот ден од мисијата е целосно посветен на финалните подготовки за враќање на Земјата, при што вселенското летало веќе ја прави последната корекција на траекторијата. Овој маневар е клучен за прецизно позиционирање на капсулата пред нејзиниот влез во атмосферата.
Пред самиот контакт со атмосферата, капсулата Orion ќе се одвои од сервисниот модул, изложувајќи го својот топлотен штит. Се очекува леталото да навлезе во горните слоеви на атмосферата со брзина од околу 40.000 километри на час, при што топлотниот штит ќе треба да издржи температури кои достигнуваат над 1.600 Целзиусови степени. Овој процес на аеродинамичко забавување е неопходен за безбедно спуштање на астронаутите.
Системот за слетување се потпира на комплексна мрежа од падобрани кои сукцесивно ќе се отвораат за дополнително да ја намалат брзината на капсулата на приближно 30 километри на час пред самиот контакт со водата. Планирано е леталото да слета во водите на Тихиот Океан, во близина на брегот на Сан Диего, каде што веќе се стационирани тимовите за поддршка предводени од NASA и американската морнарица.
Слетувањето се планира за 2:07 часот по полноќ по македонско време, а преносот во живо ќе започне 30 минути по полноќ, а ќе може да се гледа од повеќе места, меѓу кои и YouTube каналот на NASA.
Оваа мисија претставува важен тест за технологиите кои ќе се користат во идните лунарни мисии. Успешното враќање на екипажот и претстојната анализа на собраните податоци и перформансите на хардверот ќе бидат од клучно значење за понатамошниот развој на процедурите за следните фази од вселенската програма.
