Таканаречените универзални апликации за Windows јасно е дека не успеаја да ги привлечат програмерите кои продолжија да ги развиваат класичните win32 апликации, а посебно по неуспехот на Windows 10 Mobile и намалувањето на потребата од апликации кои работат на повеќе видови уреди.
Microsoft, иако го намали значењето на UWP платформата, не го откажува нејзиното постоење и развој, сепак нуди одредени предност над класичните апликации, но затоа сега ќе се обиде барем да го унифицира развивањето.
Апликациите кои ќе се развиваат за Windows веќе нема да се делат, па истите ќе бидат едноставно наречени Windows апликации. Ова ќе се постигне преку промените кои ќе се воведат преку Project Reunion, кој беше најавен на Microsoft Build 2020.
Со Project Reunion, Microsoft ја намалува бариерата, како што истакнуваат, помеѓу win32 и UWP алатките преку нивно спојување. Со ова програмерите можат да продолжат да развиваат една апликација која ќе треба да работи на сите видови на уреди со Windows.
Тие исто така ќе можат да ја искористат и новата верзија од WinUI 3 која го донесува Fluent дизјанот кај апликациите, а програмерите ќе имаат можност и за прилагодување на нивните веб апликации преку WebView 2.
Техничките детали поврзани со Project Reunion можете да ги прочитате во најавата на Microsoft на оваа страна.
