Сигурно нема некој од вас кој што нема видено барем неколку од веќе големиот број на видеа во кои што познати личности од разни области се поливаат со кофа полна со ладна вода. Оваа кампања наречена Ice Bucket Challenge е направена со цел да се подигне свеста на луѓето во врска со Амиотрофична латерална склероза (АЛС) болеста. Кампањата, односно предизвикот како што е официјално наречена, вклучува објавување на снимки од познатите личности како си истураат кофа со ладна вода и притоа да предизвикаат додатни три личности да го направат истото. Можеше да се видат видеа од Satya Nadella, Tim Cook, George Bush, Bill Gates, Новак Џоковиќ и многу други.
Денеска Samsung претстави видео во кое што ја искористува популарноста на предизвикот и наместо некоја личност, вода е истурена врз нивниот најнов модел Galaxy S5. Се разбира се работи за анимација, односно реклама во која што се промовира водоотпорноста на нивниот модел. Во видеото Galaxy S5 ги предизвикува iPhone 5s, HTC One (M8) и Nokia Lumia 930 да го прифатат предизвикот.
Според одредени луѓе ова е невкусен начин на искористување на една ваква кампања за промовирање на сопствен производ. Други можеби ќе сметаат дека и ова е еден од начините за зголемување на свеста за болеста. Во продолжение можете да го погледнете видеото и самите да донесете заклучок за неговата содржина.
