Првите паметни телефони кои се „вистински“ на Google годинава добија многу позитивни критики и рецензии и се најпродаваните смартфони на брендот досега. Сепак, корисниците веќе објавуваат најразлични проблеми, од кои изгледа најраширен е проблемот со звукот.
Имено, многу корисници јавуваат дека Pixel и Pixel XL паметните телефони, го дисторзираат звукот при висока гласност. Поточно, кога ќе се попушти гласноста до крај, доаѓа до звук на пукање на одредени фреквенции, а некои корисници јавуваат дека проблемот постои и на сите фреквенции.
Исто така, проблемот не е ограничен само на звучникот на телефонот, што би било донекаде и очекувано бидејќи тој звучник и така е прилично слаб. Многу корисници јавуваат дека проблемот се јавува и кога се приклучени слушалки или каков и да било друг аудио излез и од било која апликација – било дали е видео на YouTube и на Facebook или песна пуштена преку Spotify и некој други апликации за пуштање или стримање музика.
Многу интересно, има и корисници кои јавуваат дека проблемот е присутен и кога ќе пуштат видео или аудио преку Chromecast или пак преку било кој друг “Casting” уред или телевизор. Ова значи дека проблемот е веројатно софтверски, бидејќи во случајот на “Casting”, уредот кој го прима звукот ги црпи податоците директно од интернет мрежата, односно во случај на видео од YouTube го пушта директно од таму, а не од самиот телефон.
Бидејќи аудио дисторзијата е прилично распространета, Google сигурно ќе пушти софтверски закрпи кои ќе го решат проблемот. Сепак, доколку е хардверски, односно има некој дел во телефонот кој го предизвикува тоа, очекувајте и масовен отповик на смартфоните во сервис, што секако не е добра вест за Google.
