Гигантот од Редмонд буквално неделно почна да претставува нови технологии, благодарение на Microsoft Research одделот, кој е особено активен во последно време. Нивното најново „откритие“ веќе го имаме видено во неколку различни форми досега, како на пример Air View и Air Gesture кај смартфоните на Samsung, но според она што тука можеме да го видиме, овој систем ќе биде многу пософистициран.
Идејата зад pre-touch е да го препознае прстот уште пред тој да го допре дисплејот. Поточно, според Бен Хикли од Microsoft, овој систем ќе ги користи вашите прсти како прозорец до вашиот ум, односно ќе може да предвиди што сакате да направите. Секако, прво што ќе се помисли е дека ќе можете да гледате слајдови од фотографии само со поминување на прстот над дисплејот, односно да скролате по веб страни на истиот начин, но ова решение нуди многу повеќе.
На пример, поради неговата прецизност, “Pre-touch sensing” може да се користи за прецизно селектирање на икони, како на пример оние во “Downloads”, со цел да се отвори мени со различни можности, како Copy, Paste и Delete. Изведбата е слична на 3D Touch кај Apple iPhone, но наместо посилно притискање, корисникот треба само да го задржи прстот над дисплејот на саканата локација.
Интелигентниот систем е покажано и како се користи за паметно криење, односно покажување на контролите во видео плеерот – со поминување на прстот преку дисплејот контролите автоматски се појавуваат, нешто слично како кога ќе го мрднете маусот на вашиот компјутер. Системот може да препознае и кога корисникот го држи телефонот со две раце и да прикаже дел од контролите на секој прст засебно.
Овој “Pre-touch sensing” делува навистина интересно и би можел да го смени начинот на кој ги користиме нашите смартфони и таблети, но како и многу проекти на Microsoft Research досега може и да не го дочека светлото на денот. Сепак, Microsoft веќе во минатото најави сличен систем со неуспешниот смартфон проект McLaren, па нема да биде чудно доколку тоа се случи во некој од идните Windows 10 Mobile уреди. Кхм, Surface Phone, кхм.
Извор: Geek, Android Authority, WinBeta
