На Twitter прилично често се случуваат официјални препукувања меѓу производителите на техника. Најновото е особено интересно зошто во желба да се покаже пред публиката, Motorola, која е сега во сопственост на Lenovo, буквално се „изгоре“, обвинувајќи го Samsung дека ја украл можноста за прикажување на информации на заклучениот телефон, таканаречената “Glance Screen”.
Точно е дека оваа функција беше вградена во телефоните на Samsung од неодамна, а е достапна во телефоните на Motorola од порано, но апсолутно не е точно дека Motorola е првиот со ваква функција. Имено, првите паметни телефони со “Glance Screen” функција се Nokia и тоа од времето на Symbian, MeeGo и Windows Phone 7.8 оперативните системи. Финскиот производител оваа можност ја претстави во 2009 година, многу пред Motorola да го направи тоа.
@Moto_USA Nokia did it first, but don’t worry your implementation still better than all the rest because it’s actionable.
— Matthew Miller (@palmsolo) August 19, 2016
Твитер заедницата веднаш се погрижи да ги потсети Motorola дека тие воопшто не се први (ова веројатно не го знаеле во маркетинг одделот на производителот), нагласувајќи ја Nokia. И навистина, обвинувањето за кражба им се врати како бумеранг – ако Samsung украл од нив, тогаш и тие украле од некого, нели?
“Glance Screen” или “Always On Display” се функции кај паметните телефони кои му овозможуваат на дисплејот цело време да работи без да троши многу батерија, истовремено прикажувајќи му информации на корисникот, како времето и нотификациите. Оваа функција особено добро фунцкионира кај AMOLED екраните, бидејќи тие треба да ги „запалат“ само пикселите задолжени за информациите – црниот дел од дисплејот не троши воопшто батерија.
Извор: MS Power User, The Next Web, The Guardian
