Samsung официјално ги објави новите паметни телефони од својата серија A. Станува збор за моделите Galaxy A57 5G и Galaxy A37 5G, кои се позиционираат на пазарот како уреди што нудат напредни технолошки решенија по подостапна цена. Фокусот на компанијата со оваа објава е пренесување на функции од повисоките класи во уреди наменети за пошироката публика.
Двата нови модели доаѓаат со Super AMOLED+ екрани кои обезбедуваат квалитетен приказ на сликата и флуидна навигација благодарение на поддршката за стапка на освежување од 120Hz. Дизајнот останува доследен на актуелниот визуелен идентитет на компанијата, карактеризиран со рамни рабови и минималистичко поставување на задните камери, со што се задржува унифицираниот изглед со остатокот од Galaxy портфолиото.
Во сегментот на фотографијата и видеографијата, Samsung интегрира системи кои значително ги подобруваат можностите на уредите од оваа ценовна категорија. Камерите кај A57 5G и A37 5G поддржуваат напредни софтверски алгоритми за фотографирање во услови на слаба осветленост, односно познатата Nightography од компанијата. Овие додатоци овозможуваат снимање на постабилни видео записи и креирање на фотографии со намален дигитален шум кога недостасува природна светлина.
За непречено функционирање на уредите се задолжени нови процесори со вградена поддршка за 5G мрежи, кои се оптимизирани за баланс помеѓу перформансите и потрошувачката на енергија.
Телефоните се опремени со батерии со капацитет од 5000 mAh, кои се дизајнирани да обезбедат долготрајна автономија, а вклучена е и поддршка за стандардното брзо полнење на производителот.
Samsung очекувано ги промовира функциите со вештачка интелигенција кои им се достапни на корисниците и од оваа класа, како што се Voice Transcription, AI Select, Object Eraser, Best Face и повеќе.
