Можноста за лесно префрлање на .apk датотеките, односно Android апликациите во Windows 10 Mobile беше позитивно пречекана – дивелоперите буквално без преправки можеа да објават таква апликација на Windows Store. Сепак, според најнови информации, Project Astoria најверојатно ќе биде изгаснат.
Има многу толкувања зошто тоа ќе се случи, па затоа еве едно мое размислување. За разлика од Project Islandwood, односно проектот со кој дивелоперите можат со многу мали преправки да претворат iOS (iPhone и iPad) апликација за да може да работи на Windows 10 Mobile, Project Astoria е емулатор вграден во оперативниот систем.
Како и сите емулатори и овој треба да овозможи средина која ќе ги препознава Android апликациите и која ќе знае како да ги пушти. Нешто како Android кој е вграден во Windows 10 Mobile. Сепак, како и секој емулатор и со овој се јавуваат многу проблеми. Според некои внатрешни информации, Project Astoria го забавувал целиот Windows 10 оперативен систем, што е една од причините да биде згаснат проектот, но според мене, поголема причина е намалената безбедност и можноста за пиратерија.
Да, со Project Astoria, многу е лесно и самиот корисник да инсталира Android апликација, само со ставање на .apk датотеката во телефонот. Ова значи дека не само што можете да користите датотека симната од Google Play Store, туку и некоја симната од торент клиент, бесплатно. Секако, последно нешто што сакаат Microsoft е да имаат еко систем кој ќе ја поддржува пиратеријата.
И на крај, тука е и бркањето на актуелните дивелопери. Иако ги има многу помалку отколку на конкурентните платформи, Windows Phone и натаму има активни дивелопери на квалитетни апликации, кои секако не сакаат да имаат конкуренција која буквално без работа ќе им ги земе корисниците. А од страна на Microsoft, секако би било лошо да ги избркаат лојалните дивелопери, кои и натаму развиваат апликации и покрај тоа што Windows Phone не е особено успешен еко систем.
Што значи ова? Не верувам дека ќе скрати многу од апликациите кои треба да пристигнат на Windows 10 Mobile, но сигурно ќе има некои што ќе се откажат од развојот, односно префрлањето. Сепак, Project Islandwood е тука, кој треба да донесе ги квалитетните iOS апликации во Windows 10 Mobile, а први од нив најверојатно ќе бидат и новите Facebook, Instagram и Messenger.
