Кинеските производители веќе целосно го прифатија алуминиумот како избор на материјал за своите смартфони, макар тие биле и од средната класа. Новите два телефони на ZTE се токму такви – имаат солидни спецификации и изгледаат прилично луксузно, а веројатно ќе бидат и достапни (ZTE сеуште ги нема објавено цените).
Двата телефони се со различни големини – Blade 7 има 5,2 инчен дисплеј со Full HD резолуција, додека Lite верзијата има 5 инчен дисплеј со HD резолуција. Поголемиот модел има MediaTek MT 6753 процесор со осум ARM Cortex-A53 јадра на 1,5 Ghz и Mali-T720 графика, помогнат од 2 GB рам меморија и 16 GB простор, со можност за проширување преку micro SD картичка.
Батеријата има капацитет од 2.500 mAh, што не е импресивно, но би требало да е доволно за цел ден користење. Камерите се солидни, барем на хартија – задната има 13 мегапиксели со блиц со две LED диоди во различни бои, додека предната има 5 мегапиксели и можност за користење на дисплејот како блиц – идеја веројатно позајмена од iPhone.
Помалиот Lite модел пак има MediaTek MT6735P процесор со четири ARM Cortex-A53 јадра на 1,3 Ghz, идентична Mali-T720 графика, 2 GB рам и 16 GB простор со слот за micro SD картичка. Blade 7 Lite има и идентична батерија со капацитет од 2.500 mAh, но има различни камери – тука и двете имаат по 8 мегапиксели. И веројатно најинтересно од се, кај овој модел има читач за отпечатоци на прстите во задниот дел, кој изненадувачки недостасува кај помоќниот модел. Двата уреди нормално доаѓаат со најновата Android Marshmallow верзија.
Цените за двата уреди сеуште не се објавени, но се знае каде ќе бидат достапни – Blade 7 ќе се продава во Германија и Шпанија од европските земји, додека Blade 7 Lite во Германија, Шпанија и Русија. Сеуште нема информации дали ќе ги добиеме и на нашиот пазар, но држиме стегнати палци.
Извор: Android Central, GSMArena, Android Auhority
