Bluetooth е второто најкористено безжично поврзување денес, после Wi-Fi и кога ќе има нова верзија, треба да бидеме возбудени. Новиот Bluetooth 5 стандард донесува поголема брзина и опсег, кои се особено значајни за “Internet of Things” уредите низ домот.
Овие подобрувања значат дека корисникот ќе може да биде поврзан со уредите многу подалеку отколку досега. Опсегот е 4 пати поголем, што е веројатно доволно за вашиот паметен телефон да остане врзан со уредите низ целиот дом. Bluetooth 5 ќе овозможи безжично поврзување на IoT уреди низ цела зграда, што е голема вест за целата индустрија.
Исто така, двојното зголемување на брзината значи дека со Bluetooth 5 ќе може да се користи во многу повеќе ситуации. Досега, Bluetooth се користеше главно за пуштање музика, но со 5-ката, на него ќе може да се поврзат сите IoT уреди низ домот и тој ќе може да се користи и за индустриски и комерцијални апликации. Досега, многу такви уреди беа приклучени на Wi-Fi, која не е особено стабилна мрежа доколку има многу уреди на еден рутер во вашиот дом.
Bluetooth 5 сепак нема да донесе подобрувања во аудио квалитетот, иако најголемите производители на паметни телефони веќе ги вадат 3,5 mm приклучоците од своите модели и на големо се ослонуваат на безжичните слушалки. Сепак, мала надградба, како на пример Bluetooth 5.1, би можела да донесе вакви подобрувања.
Извор: Android Central, The Next Web, Tech Radar
