Cruise е систем во развој од американска стартап компанија кој што се додава на вашиот автомобил и со тоа се овозможува негово управување од страна на системот. Може да се каже дека овој систем е нешто измеѓу само-управувачките автомобили кои што ги развиваат некои компании, како таа на Google на пример и Cruise Control системот достапен во подобрите автомобили. За разлика од само-управувачките автомобили, Cruise нема да ви овозможи целосно предавање на контролата на управување, односно нема да може да зададете дестинација и автомобилот сам да ве однесе. Исто така постојните и стари Cruise Control системи овозможуваат одржување на зададената брзина, а некои од нив може да забават во одредени ситуации, меѓутоа не се во можност да го вратат воланот или да прават слични посложени активности.
Cruise системот во основа е еден вид на многу понапреден Cruise Control систем, кој што овозможува управување на автомобилот на автопатиштата, контрола на брзината, одбегнување на пречки, менување на лентите, заштита од сообраќајни несреќи и слично. Се вклучува преку посебно копче кое што се вградува со автомобилот, заедно со компјутер со багажникот и контроли за воланот и педалите.
Моментално системот е во тест фаза и е вграден во модел од Audi. За да може да работи развивачите потребно е да направат снимање на автопатиштата, по што тие ќе бидат поддржани од системот. Планирано е да се продава по цена од 10.000 долари и да може да биде вграден во избрани модели од автомобилите.
