На „Let Loose“ настанот денеска, Apple ги претстави сите очекувани нови производи кои беа неофицијално најавувани. Главни слободно може да се каже дека се новите iPad Pro со двоен OLED екран и М4 чипот, заедно со нова Magic Keyboard и Apple Pencil Pro, но одлична надградба доби и iPad Air.
Точно како што беше најавено, iPad Air сега има две големини, па покрај стандардната 11 инчна верзија, сега корисниците можат да изберат и поголема, 13 инчна верзија од таблет компјутерот.
Покрај оваа промена, iPad Air сега предната камера ја поставува на страната, односно за користење во пејзаж позиција, нешто што дефинитивно е подобро и повеќе корисно при видео повиците.
За работата на новите iPad Air тука е М2 чипот, а од компанијата најавуваат 50% подобрување кај перформансите во споредба со претходната генерација која дојде со М1.
iPad Air доаѓаат со поддршка за новото Apple Pencil Pro, а секако тука е и Magic Keyboard.
Apple и за овие модели истакна дека се моќни кога е во прашање вештачката интелигенција, но ќе мора да почекаме уште еден месец за да ги видиме новините кои ќе дојдат на овој план.
