На годинешниот саем CES 2026, LG повторно ги помести границите во премиум сегментот на телевизори со претставувањето на LG OLED evo W6. Станува збор за наследник на познатиот „Wallpaper“ дизајн од 2017 година, но овојпат со клучна карактеристика која го менува начинот на кој го замислуваме домашниот систем за забава – целосно безжично поврзување.
Веднаш станува јасно дека со овој телевизор LG пушта директна конкуренција на одличните The Frame од Samsung, кои исто така користат безжична технологија за поврзување на екранот.
Главниот адут на W6 е неговата неверојатна дебелина од само 9 милиметри. Благодарение на екстремната минијатуризација на компонентите, телевизорот се поставува потполно рамно со ѕидот, без никаков простор помеѓу панелот и подлогата.
Zero Connect Box е единицата која се поставува безжично и го овозможува целосно функционирање. Оваа надворешна единица може да се постави до 10 метри подалеку од екранот, пренесувајќи 4K видео и аудио со 165Hz без никаква загуба во квалитетот. Единствениот кабел кој е потребен е оној за напојување, што овозможува чист и минималистички изглед во просторијата.
Иако дизајнот е во преден план, LG не направи компромис со сликата. Новата Hyper Radiant Color технологија, во комбинација со Brightness Booster Ultra, му овозможува на W6 да достигне осветленост која е дури 3,9 пати поголема од конвенционалните OLED телевизори.
Дополнително, панелот доаѓа со „Reflection Free Premium“ сертификат, што значи дека рефлексиите од прозорците или осветлувањето во собата се сведени на минимум, задржувајќи ги совршените нијанси на црна боја по кои е познат OLED.
Под хаубата се наоѓа новиот Alpha 11 AI Processor Gen3, со 5,6 пати побрз NPU (неврален процесор).
LG продолжува да биде прв избор за гејмерите, нудејќи спецификации кои се реткост во ТВ индустријата, 4K резолуција со 165Hz освежување, време на одзив од неверојатни 0,1ms и целосна поддршка за NVIDIA G-SYNC и AMD FreeSync Premium.
