Заедницата за групно вложување во која влегуваат Kickstarter, Indiegogo и останатите не покажува знаци на замор. За жал, понекогаш се случуваат неочекувани застои, па дури и откажувања поради технички или други проблеми.
Еден таков пример е уредот Fin кој требаше да биде прстен со кој преку гестикулации ќе можевте да управувате други уреди. За среќа, неговите создавачи решија да не се откажат туку да го изменат после долга анализа.
Резултатот е Neyya, уред кој повторно е прстен, но овојпат наместо гестикулации содржи површина осетлива на допир. Neyya се поврзува преку Bluetooth со некој друг уред (телефонот, компјутерот…) и може да се користи за негово командување. На пример, во случај ако треба да држите презентација преку Neyya ќе можете да ги вртите страниците на презентацијата без напор, па дури и скриено.
Способностите на Neyya не завршуваат тука, па можете да наместите 3 апликации кои ќе можат да праќаат известувања до прстенот, а тој ќе вибрира. Тој дури има и LED светилки со кои може да ве потсети за одредени настани, како на пример, да се напиете апче или да започнете со медитација.
Прстенот се нуди во две варијанти, титаниумска и златна, и може да се купи директно од страницата на производителот за 139, односно 179 долари. Според претседателот на тимот, Соња Хант, „Не ни треба да вадиме уреди (на пазарот; заб.) само за да ги вадиме. “ Таа вели дека по натпреварите и групното вложување „… навистина требаше да се регрупираме и да промислиме дали тоа беше вистинскиот производ и ако не, како можеме да го направиме подобар. Навистина да биде производ кој луѓето можат да го користат и кој ќе ги подобри нивните животи“.
Останува да видиме каков одговор ќе има од пазарот. Инаку, ние и претходно имаме пишувано за сличен уред, во тој случај како прекривка за ноктот од палецот.
Извор: TechCrunch, Biz Journals
